:::: كل يوم جديد ::::

بسم الله الرحمن الرحيم

عندي محاوله إنشاء الله تنال إعجابكم بعنوان ..
كل يوم جديد

كل يوم جديد ‏..‏ دايرنو عيد ‏..
بسمة أمل مزدانه بي لون الصباح
لا شفنا عيد ..!
لا شفنا كيف فجر الأمل قدامنا لاح .. !
قالو العزيمه هي لازمة ..
ونتحلي بي روح الكفاح
ولازم كمان نديها جرعه من الصمود ..
وأكتر من الجهد المتاح
ود كلو ليه .. !؟
علشان تكون زول ليك مكان ..
ودنياك معبده بالنجاح
كلمات مشبعة بالحروف ..
ولغة الكلام والإصطلاح
الروح هي وين .. !؟
ضاعت خلاص وسط العواصف والرياح
كيفن نحارب في الجيوش
من غير أيادي ولا سلاح ؟
وكيفن يطير عصفور جريح من غير جناح ؟
وكيفن نكون أو لا نكون
وكل البنعمل فيهو راح ؟
وكل ما نداويهو الجرح
يفتح معاهو مليون جراح ؟
وبرضو الهموم ما بتنتهي
والدنيا ما بتعرف سماح
حنعيشها كيف من غير سرور
غبطه وسعادة وإنشراح ..!
والإنشراح غاب في الحقيقية وفي المنام
تاه في الدروب ..
طعم الفرح والإبتسام
وإتشابكت خصل الدموع ..
غصت تعابير الكلام
وبقينا عايشين في السراب ..
والنور كساه الهم غمام
وسكتنا ما قادرين نقول ..
ورفعنا راية الإنهزام ..
والإنهزام فايتنا وين ..؟
في كل خطوه بنرسمها ..
نلقي الحزن ناصب كمين
نلقاهو يهدم في الأمل ..
الكان بنيناهو في سنين
نلقاهو ينزع كل جميل ..
يزرع مكانو أسي وأنين
لكن بنحمد ربنا ..
في كل لحظه وكل حين
يا ربي حامدنك كتير
إنك خلقتنا مسلمين
اهدينا للدرب السوي
واملانا بي عطفك يقين
لزمنا ربي علي الصبر
وأرزقنا بالمال والبنين ..